«Առաջնորդությունը քաոսի դարաշրջանում․ առասպելնե՞ր և իրականությո՞ւն» թեմայով վարպետության դասը տեղի է ունեցել ՌՀՀ-ում հոկտեմբերի 13-ին՝ «Մասնագիտության ներածություն» առարկայի շրջանակում։ Վարպետության դասը վարել է Արաքսյա Միրաքյանը՝ Մոսկվայի Լոմոնոսովի անվան պետական համալսարանի Տնտեսագիտության ֆակուլտետի և Բարձրագույն բիզնեսի դպրոցի Կազմակերպության կառավարման ամբիոնի դոցենտ։

 

Հանդիպման ընթացքում բանախոսն անդրադարձել է բարձր անորոշության և արագ փոփոխությունների պայմաններում առաջնորդության առանձնահատկություններին, քննարկել առաջնորդության մասին տարածված պատկերացումները, առասպելների և իրականության հարաբերակցությունը, ինչպես նաև ժամանակակից դինամիկ միջավայրում արդյունավետ առաջնորդական վարքագծի հիմնական սկզբունքները։

 

Արաքսյա Միրաքյանը «Բիզնեսի զարգացման կառավարում» մագիստրոսական ծրագրի խորհրդի և Տնտեսագիտության ֆակուլտետի ուսումնամեթոդական հանձնաժողովի անդամ է։ Դասավանդման գործունեությունը սկսել է 2015 թվականին, իսկ 2024 թվականին արժանացել է «Տնտեսագետի ոսկի» մրցանակին՝ մանկավարժական վարպետության բարձրագույն աստիճանի համար։

 

Վարպետության դասը կազմակերպվել էր ՌՀՀ Տնտեսագիտության և բիզնեսի ինստիտուտի Կառավարման և բիզնեսի ամբիոնի կողմից։