РОССИЙСКО-АРМЯНСКИЙ УНИВЕРСИТЕТ

20 Նոյ
2024

ՀՌՀ-ում քննարկեցին մարզչի կատարելագործման հիմնահարցերը սպորտի զարգացման համատեքստում

Աշխատաժողովը կազմակերպել էր Հայ-ռուսական համալսարանի ֆիզիկական դաստիարակության և առողջ ապրելակերպի ամբիոնը՝ ՀՀ կրթության, գիտության, մշակույթի և սպորտի նախարարության հետ համատեղ:

Պետության դերը սպորտի զարգացման գործում մեծ է և անվիճելի, սակայն հնարավոր չէ սպորտային համակարգ կառուցել բացառապես պետական միջոցների հաշվին: Այս մասին այսօր «Մարզչի կատարելագործման հիմնահարցերը սպորտի զարգացման համատեքստում» խորագրով աշխատաժողովի հանդիսավոր բացման ժամանակ Հայ-ռուսական համալսարանում նշեց ՀՀ կրթության, գիտության, մշակույթի և սպորտի փոխնախարար Կարեն Գիլոյանը:

Նրա խոսքով՝ անհրաժեշտ է մարզագիտության զարգացում, ակումբների ձևավորում, որոնք աստիճանաբար գերիշխող կդառնան երկրի առաջնություններում և կունենան իրենց ներկայացուցիչները միջազգային ասպարեզում:

«Այսօր ամբողջ աշխարհը շարժվում է դեպի ակումբային սպորտ, այդ իսկ պատճառով ուսանողական սպորտը հիմք է դառնում միջազգային ասպարեզում մեծ նվաճումների համար։ Լավ պայմանների և ենթակառուցվածքների ստեղծումը առաջին քայլն է այն ակումբների ձևավորման ուղղությամբ, որոնք կմասնակցեն ազգային առաջնություններին: Այդ ակումբների անդամները կկարողանան իրենց երկրները ներկայացնել ազգային հավաքականների կազմում, ինչը ոչ միայն օգուտ կտա, այլև պատիվ կբերի իրենց պետություններին», - նշեց Գիլոյանը։

Փոխնախարարը կարևորեց նաև ՀՌՀ-ում ստեղծված մարզական ենթակառուցվածքը՝ հույս հայտնելով, որ բուհի ուսանողները կկարողանան առաջատար դիրքեր զբաղեցնել տարբեր մարզաձևերի մրցումներում:

Իր հերթին ՀՌՀ ֆիզիկական դաստիարակության և առողջ ապրելակերպի ամբիոնի վարիչ Արմեն Գրիգորյանը նշեց, որ աշխատաժողովի ընթացքում հայտնի փորձագետները կքննարկեն մարզչի կատարելագործման հիմնահարցերը սպորտի զարգացման համատեքստում, միջազգային առաջնություններին և օլիմպիադաներին նախապատրաստվելու համար ձեռնարկվող քայլերը, մանկապատանեկան սպորտի կայացման խնդիրները և բազմաթիվ այլ հրատապ թեմաներ:

«Մենք լավ գիտենք, որ սպորտային արդյունքի 50-60%-ը կազմում են գիտելիքները սպորտային բժշկություն որորտում, ճիշտ տեխնիկան և մի շարք ուրիշ ասպեկտներ, առանց որոնց անհնար է պատկերացնել հաջողությունը։ Այդ պատճառով մենք պարոն Գիլոյանի հետ միասին որոշեցինք, որ պետք է հնարավորություն ունենանք մեր մարզիչներին պարբերաբար ծանոթացնել սպորտային գիտությանը», — շեշտեց նա։

Արմեն Գրիգորյանը հավելեց, որ Հայ-ռուսական համալսարանը պատրաստ է հոգեբանական աջակցություն ցուցաբերել հավաքականների մարզիկներին, ինչը նրանց պատրաստվածության կարևոր մասն է կազմում:

Հյուրերին և խոսնակներին ողջունեց նաև ՀՌՀ գիտության գծով պրոռեկտոր Պարգև Ավետիսյանը. «Մենք հպարտ ենք, որ կարող ենք օգտագործել մեր հարթակը և առկա բոլոր հնարավորությունները, ներառյալ մարզադահլիճները, որոնք միշտ ձեր տրամադրության տակ են: Նախարարության մասնակցությունն այս գործընթացին կարևոր քայլ է մարզագիտության մեջ նոր բարձունքների հասնելու համար»:

Նշենք, որ աշխատաժողովը կազմակերպել էր Հայ-ռուսական համալսարանի ֆիզիկական դաստիարակության և առողջ ապրելակերպի ամբիոնը՝ ՀՀ կրթության, գիտության, մշակույթի և սպորտի նախարարության հետ համատեղ:

ԶԼՄ-ները` աշխատաժողովի մասին

1) https://shabat.am/am/article/335745/Anhrajhesht-e-unenal-gitakanoren-kirt

2) https://armtimes.com/hy/article/301027

3) https://escs.am/am/news/25831

4) https://operativ.am/?p=571857&l=am

5) https://freenews.am/post/77cb522148ce5a31f0fd23909c4a9eaf

6) https://progressarmenia.com/?p=16656

7) https://www.1lurer.am/hy/2024/11/20/1/1223777

8) https://zarkerak.am/show/115614

9) https://civic.am/news/81054

10) https://www.shantnews.am/news/view/1534846.html

11) https://armenpress.am/hy/article/1205463