Ռուս-Հայկական համալսարանի Միջազգային հարաբերությունների և հասարակաքաղաքական գիտությունների ինստիտուտի տնօրեն, պատմական գիտությունների դոկտոր, պրոֆեսոր Երվանդ Մարգարյանը և Բանասիրության և միջմշակութային հաղորդակցության ինստիտուտի Համաշխարհային և ռուս գրականության ու մշակույթի ամբիոնի պրոֆեսոր, արվեստագիտության թեկնածու Գայանե Մարգարյանը առկա ձևաչափով մասնակցել են «Հայաստանը՝ դարերի ու աշխարհների խաչմերուկ» («Armenia – Crossroad of Centuries and Worlds») միջազգային գիտաժողովին, որը տեղի է ունեցել հունիսի 18–19-ը Բուլղարիայի Հանրապետության Սոֆիա քաղաքում։ Հեղինակավոր գիտական համաժողովը կազմակերպել էր Սոֆիայի Սուրբ Կլիմենտ Օխրիդսկու անվան համալսարանը և նվիրված էր համալսարանի Դասական և ժամանակակից բանասիրության ֆակուլտետի «Դասական Արևելքի» ամբիոնի «Հայագիտություն և կովկասագիտություն» մասնագիտության հիմնադրման 30-ամյակին։

Գիտաժողովի մասնակիցներն ու բանախոսները քննարկել են լեզվի և խոսքի՝ որպես մշակույթների միջև կամուրջների դերը, պատմական և առասպելաբանական պատկերացումները լայն ժամանակային համատեքստում, մշակութային ժառանգությունը՝ որպես հասարակական հիշողության կենդանի վկայություն, հոգևոր ավանդույթներն ու փիլիսոփայական գաղափարները դարաշրջանների հատման կետում, ինչպես նաև արվեստի, արհեստների և նյութական մշակույթի պատմական զարգացման խնդիրները։ Գիտաժողովի շրջանակում պրոֆեսոր Երվանդ Մարգարյանը հանդես է եկել «Աստվածների և կայսրությունների միջև. Հայաստանը որպես միջաշխարհ» թեմայով զեկույցով։ Իր հերթին Գայանե Մարգարյանը ներկայացրել է «Երևանը ХХ դարի երկրորդ կեսի - XXI դարի սկզբի երգարվեստի երաժշտական-խոսքային տեքստում» թեմայով հետազոտությունը։

Միջոցառմանը առցանց ձևաչափով հանդես են եկել նաև ՌՀՀ Բանասիրության և միջմշակութային հաղորդակցության ինստիտուտի տնօրեն, պրոֆեսոր Նինա Տատկալոն և Հայոց լեզվի և գրականության ամբիոնի վարիչ, պրոֆեսոր Գայանե Գևորգյանը՝ ներկայացնելով «Առած-ասացվածքների համարժեքության միջլեզվային դիտարկումներ հայերենում, անգլերենում և ռուսերենում» թեմայով զեկույցը, Համաշխարհային քաղաքականության և միջազգային հարաբերությունների ամբիոնի պրոֆեսոր, պատմական գիտությունների դոկտոր Արմեն Մարուքյանը՝ «Հայոց ցեղասպանությունը և Հոլոքոստը. ընդհանուր գծերն ու տարբերությունները» թեմայով, Միրումյանի անվան քաղաքագիտության ամբիոնի վարիչ, փիլիսոփայական գիտությունների թեկնածու, դոցենտ Հովհաննես Սարգսյանը՝ «Գիտությունը և փիլիսոփայությունը վաղ միջնադարյան Հայաստանում մշակութային ազգի մոդելի ձևավորման և գործառման համատեքստում» թեմայով, ինչպես նաև Հայոց լեզվի և գրականության ամբիոնի դոցենտ Նաիրա Իսկանդարյանը՝ «Առասպելից ավանդույթ. մշակութային պատկերացումների փոխանցման ընտանեկան մեխանիզմները հայկական «Սասնա ծռեր» էպոսում» թեմայով զեկույցով։

Նշենք, որ «Հայաստանը՝ դարերի ու աշխարհների խաչմերուկ» միջազգային գիտաժողովը կարևոր հարթակ դարձավ գիտական փորձի փոխանակման և հայագիտության ոլորտում ՌՀՀ միջազգային կապերի ամրապնդման համար։