Նոյեմբերի 9-ին՝ ժամը 10:20-ին, Ռուս-Հայկական համալսարանի Մշակույթի տանը կկայանա III Ռուս-Հայկական մեդիաֆորումի բացման հանդիսավոր արարողությունը։ Միջոցառումը համատեղ կազմակերպում են Ռուս-Հայկական համալսարանը և Ռուսաստանի Դաշնության գիտության և բարձրագույն կրթության նախարարությունը։

 

Ֆորումի նպատակն է խորացնել Ռուսաստանի և Հայաստանի երիտասարդների միջմշակութային երկխոսությունը, ընդլայնել մեր երկրների միջև կրթական ոլորտում տեղեկատվական համագործակցությունը, ինչպես նաև ստեղծել և տարածել մեդիաբովանդակություն, որը հանրահռչակում է երկու ժողովուրդների ընդհանուր արժեքները։ Այս տարվա ֆորումի թեման է՝ «Ուսանողական մեդիան Ռուսաստանի և Հայաստանի միջազգային համագործակցության օրակարգում»։

Ֆորումին կմասնակցեն Ռուսաստանի և Հայաստանի տարբեր բուհերի ուսանողներ։ Ֆորումի արդյունքներով նրանք կպատրաստեն համատեղ տեսանյութեր սոցիալ-մշակութային թեմաներով։

Ֆորումի շրջանակներում, որը կտևի մինչև նոյեմբերի 12-ը,  կկայանան դասախոսություններ, վարպետության դասեր և պանելային քննարկումներ` Ռուսաստանի և Հայաստանի առաջատար մեդիա մասնագետների մասնակցությամբ։