РОССИЙСКО-АРМЯНСКИЙ УНИВЕРСИТЕТ

09 Հու
2026

Իրական քեյսեր, արդյունավետ լուծումներ և նոր հնարավորություններ․ ՌՀՀ-ում ամփոփվել են «Նախագծային գործունեության հիմունքներ» դասընթացի արդյունքները

Փառատոնի ծրագրի կարևոր բաղադրիչներից էին հրավիրված փորձագետների կողմից անցկացված վարպետաց դասերը։

«Նախագծային գործունեության հիմունքներ» կրթական դասընթացի նախագծերի փառատոնը անցկացվեց Ռուս-Հայկական համալսարանում հունիսի 29-ից հուլիսի 2-ը: Լայնածավալ միջոցառումը համախմբեց ուսանողներին, մենթորներին, դասախոսներին, մասնագիտական համայնքի ներկայացուցիչներին, գործատուներին և համալսարանի գործընկերներին։ Չորս հագեցած օրերի ընթացքում ուսանողները ներկայացրին իրենց աշխատանքի արդյունքները, կիսվեցին փորձով, մասնակցեցին կրթական վարպետության դասերին և լավագույն նախագծերի մրցույթին։

Փառատոնի առաջին փուլը նվիրված էր ուսանողական նախագծերի պաշտպանությանը։ Թիմերը ներկայացրին մի քանի ամիսների ընթացքում իրական պատվիրատուների կողմից առաջադրված խնդիրների հիման վրա իրականացված աշխատանքների արդյունքները։ Փորձագիտական հանձնաժողովը գնահատում էր ոչ միայն մշակված լուծումների որակը, այլև դրանց գործնական արժեքը, նախագծերի մշակվածության մակարդակը, ինչպես նաև մասնակիցների՝ սեփական գաղափարները հիմնավոր ներկայացնելու և արդյունավետ թիմային աշխատանք իրականացնելու կարողությունները։ Պաշտպանությունների արդյունքներով ընտրվեցին տասը լավագույն թիմերը, որոնք անցան փառատոնի մրցութային ծրագրի եզրափակիչ փուլ։

Փառատոնի ծրագրի կարևոր բաղադրիչներից էին հրավիրված փորձագետների կողմից անցկացված վարպետաց դասերը։ Արթուր Կիրեևի «Ապրանքի տնտեսագիտությունը և ստարտափի մետրիկաները․ տվյալներից դեպի կառավարման որոշումներ» խորագրով վարպետաց դասի ընթացքում ուսանողները ծանոթացան արտադրանքի արդյունավետության գնահատման և տվյալահեն կառավարման ժամանակակից գործիքներին։ Պավել Կոզլովսկու ելույթը նվիրված էր արդյունավետ թիմերի ձևավորման սկզբունքներին և առաջնորդության հմտությունների զարգացմանը։ Անահիտ Խաչատրյանը ներկայացրեց «Անձնական աճի ռազմավարություն․ ճանապարհ դեպի ինքնաճանաչում» թեմայով վարպետաց դասը, որի շրջանակում անդրադարձ կատարվեց ինքնազարգացման և անձնական ներուժի բացահայտման հարցերին։ Իսկ Իվան Կոպայենկոյի «Sales Lab․ Ժամանակակից վաճառքների լաբորատորիա» խորագրով հանդիպման շրջանակում մասնակիցները ծանոթացան վաճառքների արդի տեխնոլոգիաներին և վերլուծեցին իրական բիզնես-քեյսեր։

Վարպետաց դասերի գործնական ձևաչափը մասնակիցներին հնարավորություն տվեց ոչ միայն ձեռք բերել նոր գիտելիքներ, այլև քննարկել իրական մասնագիտական իրավիճակներ, ուղղել իրենց հետաքրքրող հարցերը ոլորտի մասնագետներին և զարգացնել ապագա մասնագիտական գործունեության համար անհրաժեշտ գործնական հմտություններ։

Փառատոնի եզրափակիչ միջոցառումը լավագույն նախագծերի մրցույթն էր, որին մասնակցեցին պաշտպանությունների արդյունքներով ընտրված թիմերը։ Եզրափակիչ փուլում նրանք ներկայացրին իրենց նախագծերը փորձագիտական ժյուրիին՝ ցուցադրելով բարձր պատրաստվածություն, ստեղծագործական մտածողություն և հասարակության, բիզնեսի ու համալսարանի իրական պահանջներին համապատասխան լուծումներ մշակելու կարողություն։

Փորձագիտական հանձնաժողովի գնահատման արդյունքներով հաղթող ճանաչվեցին՝

🥇 I տեղ՝ №9 նախագիծ՝ «Ուսանողական ուղեցույցի արդիականացում»
🥈 II տեղ՝ №34 նախագիծ՝ «Ռուս-Հայկական համալսարանի ներքին նորմատիվ ակտերի (կանոնակարգերի, ընթացակարգերի և այլ փաստաթղթերի) մշակումը և ներկայացումը»
🥉 III տեղ՝ №21 նախագիծ՝ «Ձկների վիրուսային վարակների հայտնաբերման թեստային համակարգի մշակում»

Մրցութային ծրագրի ավարտին տեղի ունեցավ հաղթողների պարգևատրման հանդիսավոր արարողությունը։ Հաղթողներն ու մասնակիցները պարգևատրվեցին դիպլոմներով և հավաստագրերով, իսկ փորձագետները բարձր գնահատեցին ուսանողների պատրաստվածության մակարդակը, նրանց ակտիվ ներգրավվածությունն ու տեսական գիտելիքները գործնական խնդիրների լուծման մեջ կիրառելու պատրաստակամությունը։

Ինը ուսանողական նախագծեր հնարավորություն ստացան շարունակելու զարգացումը աքսելերացիոն ծրագրի շրջանակում։ Թիմերը փորձագետների աջակցությամբ կաշխատեն իրենց լուծումների կատարելագործման ուղղությամբ և կպատրաստեն նախագծերը հետագա իրականացման համար։

«Նախագծային գործունեության հիմունքներ» դասընթացի նախագծերի փառատոնը հերթական անգամ հաստատեց, որ նախագծահեն ուսուցումը Ռուս-Հայկական համալսարանի կրթական գործընթացի կարևոր բաղադրիչներից է։ Իրական նախագծերի իրականացումը, ոլորտի մասնագետների հետ համագործակցությունը, նախագծերի հրապարակային պաշտպանությունը և մրցութային գործընթացներին մասնակցությունը նպաստում են ուսանողների մասնագիտական կարողությունների, քննադատական մտածողության, թիմային աշխատանքի, հաղորդակցման և հանրային ներկայացման հմտությունների զարգացմանը։

«Նախագծային գործունեության հիմունքներ» կրթական դասընթացը Ռուս-Հայկական համալսարանում իրականացվում է Սանկտ Պետերբուրգի Պետրոս Մեծի անվան պոլիտեխնիկական համալսարանի հետ համագործակցությամբ՝ ուսանողներին հնարավորություն ընձեռելով աշխատել իրական նախագծերի վրա, ձեռք բերել արժեքավոր գործնական փորձ և զարգացնել ժամանակակից աշխատաշուկայի պահանջներին համապատասխան մասնագիտական կարողություններ։