РОССИЙСКО-АРМЯНСКИЙ УНИВЕРСИТЕТ

14 Հոկ
2026

ՌՀՀ-ն դարձել է «Ուսանողական զբոսաշրջություն» միջազգային դպրոցի հարթակներից մեկը

Հանդիպման շրջանակում անցկացվել է նաև «Վայրից դեպի տպավորություն» գործնական վարպետության դասը:

Հոկտեմբերի 14-ին Ռուս-Հայկական համալսարանում «Ուսանողական զբոսաշրջություն» միջազգային դպրոցի շրջանակում անցկացվել է հատուկ կրթական ծրագիր։ Ուսանողները դպրոցի մասնակիցներին ծանոթացրել են ՌՀՀ-ի պատմությանը, կրթական և մշակութային միջավայրին, համալսարանական տարածքներին ու ուսանողական կյանքին։ Անձնական պատմությունների միջոցով նրանք ներկայացրել են համալսարանում սովորելու հնարավորությունները, կրթական հեռանկարներն ու ուսանողական նախաձեռնությունները։

Հանդիպման շրջանակում անցկացվել է նաև «Վայրից դեպի տպավորություն» գործնական վարպետության դասը՝ նվիրված այն հարցին, թե ինչպես է զբոսաշրջային վայրը վերածվում հիշարժան փորձառության։ Մասնակիցներն անդրադարձել են տարածքի ինքնության և մթնոլորտի բացահայտումից մինչև ճանապարհորդների հետ հուզական կապի ձևավորում և յուրահատուկ զբոսաշրջային տպավորությունների ստեղծում։

Միջազգային դպրոցի մասնակիցների ծանոթությունը Հայաստանին կշարունակվի հոկտեմբերի 16-ին։ ՌՀՀ-ի ուսանողները նրանց համար կանցկացնեն հատուկ էքսկուրսիոն ծրագիր, որը հնարավորություն կտա ուսանողների աչքերով բացահայտել երկրի զբոսաշրջային ներուժը և Հայաստանը ճանաչել ոչ միայն որպես զբոսաշրջային ուղղություն, այլև որպես վառ տպավորությունների ու անմոռանալի փորձառությունների տարածք։

Նշենք, որ ՌՀՀ-ում միջոցառումը կազմակերպվել է Տնտեսագիտության և բիզնեսի ինստիտուտի զբոսաշրջության և ծառայությունների ոլորտի ամբիոնի, Միջազգային հարաբերությունների և հանրային հաղորդակցության ինստիտուտի ստեղծարար արդյունաբերությունների ամբիոնի և լրագրության ամբիոնի կողմից։

«Ուսանողական զբոսաշրջություն» միջազգային դպրոցի կազմակերպիչներն են Ռուսաստանի Դաշնության գիտության և բարձրագույն կրթության նախարարությունը, «Ուսանողական զբոսաշրջություն» ծրագիրը, Հյուսիսային Կովկասի դաշնային համալսարանը և Խաչատուր Աբովյանի անվան հայկական պետական մանկավարժական համալսարանը։