Հոկտեմբերի 6-ին` ժամը 14:30-ին, 425 լսարանում կանցկացվի բաց դասախոսություն՝ «Եզակի շուկայական առաջարկի որոնման ճանապարհի թաքնված խոչընդոտները» թեմայով։

Բանախոսը Յարոսլավ Պոլտավսկին է՝ խոշոր բիզնեսի համար ծրագրային ապահովման մշակման ոլորտում ձեռնարկատեր։ 2006 թվականին ավարտել է Մոսկվայի ֆիզիկատեխնիկական ինստիտուտը (МФТИ)։ 2006 թվականից զբաղվում է խոշոր բիզնեսի համար ծրագրային լուծումների մշակմամբ։ Նրա հիմնական մասնագիտական փորձառությունը ձեռնարկությունների բիզնես գործընթացների ավտոմատացումն է SAP արտադրանքների հիման վրա։ Լրացուցիչ մասնագիտական ուղղությունը ձեռնարկությունների գործընթացների ավտոմատացումն է՝ արհեստական բանականության հիման վրա ստեղծված լուծումների միջոցով։

Հանդիպման ընթացքում կքննարկվեն գործնական օրինակներ, որոնք ցույց են տալիս եզակի շուկայական առաջարկի որոնման և ձևավորման ընթացքում առաջացող հիմնական դժվարությունները։ Գենոմային վերլուծության, «խելացի» զամբյուղների, խոշոր մանրածախ առևտրում պրոմո-ակցիաների կառավարման և բիզնեսում բլոկչեյնի կիրառման օրինակների հիման վրա կքննարկվեն շուկայի ոչ բավարար ընկալման, տնտեսագիտական սխալ գնահատման, արժեքային առաջարկի ոչ բավարար մշակվածության, արտադրանքի բարդության թերագնահատման և ոչ հասուն տեխնոլոգիաների կիրառման խնդիրները։

Առանձնահատուկ ուշադրություն կդարձվի գաղափարի թույլ կողմերի վաղ փուլում բացահայտմանը, դրա շուկայական ներուժի գնահատմանը և նախնական գաղափարը ավելի ամբողջական շուկայական առաջարկի վերածելու գործընթացին։

Դասախոսության լեզուն՝ ռուսերեն։

Միջոցառումը կազմակերպվել է ՌՀՀ Տնտեսագիտության և բիզնեսի ինստիտուտի Կառավարման և բիզնեսի ամբիոնի կողմից։