Ռուս-Հայկական համալսարանի քաղաքագիտության ամբիոնի պրոֆեսոր, ք.գ.դ. Վահե Դավթյանը մասնակցել է «Թվայնացում, էկոլոգիականացում, համատեղ վերափոխում և բարձրորակ զարգացում» խորագրով երիտասարդ գիտնականների պատրաստման եվրասիական ծրագրին։

Ծրագիրն անցկացվել է սեպտեմբերի 16–23-ը՝ Պեկինում, ինչպես նաև Չժեցզյան և Գույչժոու նահանգներում։ Այն համախմբել է Եվրասիայի երկրների երիտասարդ հետազոտողների և նվիրված էր թվային տնտեսությանը, «կանաչ» վերափոխմանը, նորարարական զարգացմանը, «խելացի քաղաքներին» և «Մեկ գոտի, մեկ ճանապարհ» նախաձեռնության իրականացման ժամանակակից մեխանիզմներին։

Առանձնահատուկ ուշադրություն է դարձվել տեխնոլոգիական արդիականացման, տնտեսության թվայնացման և կայուն զարգացման համադրման չինական փորձին, ինչպես նաև այն ուսումնասիրելու և Եվրասիայի երկրներում կիրառելու հնարավորություններին։ Ծրագրի նպատակներից էր տարածաշրջանի հետազոտողների և չինական գիտական կենտրոնների միջև ակադեմիական կապերի զարգացումը։

Վահե Դավթյանի խոսքով՝ նման ծրագրերի առանձնահատուկ արժեքը չինական փորձն անմիջապես տեղում ուսումնասիրելու հնարավորությունն է՝ ակադեմիական քննարկումները համադրելով տեխնոլոգիական և արդյունաբերական օբյեկտների այցելությունների, ինչպես նաև չինացի հետազոտողների և մասնագետների հետ անմիջական շփման հետ։

Միջոցառումը կազմակերպվել է Չինաստանի հասարակական գիտությունների ակադեմիայի Ռուսաստանի, Արևելյան Եվրոպայի և Կենտրոնական Ասիայի ուսումնասիրությունների ինստիտուտի կողմից։