Ռուս-Հայկական համալսարանի քաղաքագիտության ամբիոնը հրավիրում է ուսանողներին, մագիստրանտներին և ասպիրանտներին մասնակցելու «Ձևափոխվող ինքնությունները Հարավային Կովկասում» միջազգային երիտասարդական ամառային դպրոցին, որը տեղի կունենա օգոստոսի 17-21-ը Ծաղկաձորում:

Նախագծի հիմնական նպատակն է ստեղծել ակադեմիական հարթակ՝ ժամանակակից քաղաքական, սոցիալական և մշակութային փոփոխությունների համատեքստում Հարավային Կովկասի պետություններում ինքնության ձևափոխման գործընթացների համալիր ուսումնասիրման համար: «Ձևափոխվող ինքնությունները Հարավային Կովկասում» ամառային դպրոցն ուղղված է գիտական երկխոսության զարգացմանը հետազոտողների, ուսանողների, մագիստրանտների և ասպիրանտների միջև, ովքեր հետաքրքրված են քաղաքական ինքնության, ազգաշինության, տարածաշրջանային անվտանգության և հասարակական ձևափոխությունների հարցերով:

Նախագծի արդիականությունը պայմանավորված է նրանով, որ ինքնությունների ձևավորման և ձևափոխման գործընթացներն էական ազդեցություն ունեն տարածաշրջանի պետությունների ներքին և արտաքին քաղաքականության, միջէթնիկ հարաբերությունների, հասարակական համախմբման և տարածաշրջանային փոխգործակցության զարգացման վրա: Հարավային Կովկասը մի տարածք է, որտեղ սերտորեն հյուսված են պատմական հիշողությունը, մշակութային ժառանգությունը, աշխարհաքաղաքական գործընթացներն ու ժամանակակից մարտահրավերները, ինչն ինքնության հետազոտությունն առանձնահատկորեն պահանջված է դարձնում ինչպես գիտական, այնպես էլ գործնական հարթությունում:

Դպրոցի ծրագիրը նախատեսում է առաջատար մասնագետների դասախոսություններ, թեմատիկ սեմինարներ, խմբային քննարկումներ և նախագծային աշխատանք՝ նվիրված ինքնության հետազոտման ժամանակակից մոտեցումներին, քաղաքական և մշակութային ձևափոխություններին, հիշողության հարցերին, ինչպես նաև Հարավային Կովկասի հասարակությունների զարգացման վրա արտաքին քաղաքական գործոնների ազդեցությանը: Հատուկ ուշադրություն է դարձվում միջառարկայական մոտեցմանը, որը միավորում է քաղաքագիտությունը, սոցիոլոգիան, պատմությունը, միջազգային հարաբերությունները և մշակութաբանությունը: Միջոցառման աշխատանքային լեզուն ռուսերենն է:

Դպրոցին կարող են մասնակցել հայաստանյան և արտասահմանյան բուհերի ուսանողները, մագիստրանտները և ասպիրանտները: Մասնակիցների տարիքը՝ 18-ից 30 տարեկան: Հայտերն ընդունվում են մինչև օգոստոսի 6-ը՝ հետևյալ հղումով՝ https://forms.gle/nSjFRdSzXqWWV8M3A Մրցութային ընտրությունն անցած թեկնածուները կտեղեկացվեն օգոստոսի 10-ին:

Հյուրընկալող կողմն ապահովում է ճանապարհածախսը Երևանից մինչև ամառային դպրոցի անցկացման վայր, կացության, սննդի և տեղեկատվական-ուսումնական նյութերի ծախսերը միջոցառման ընթացքում: Ցանկացած այլ ծախս, այդ թվում՝ հնարավոր կացությունը Հայաստանում միջոցառման օրերից դուրս (օտարերկրյա մասնակիցների համար), բժշկական ծախսերը, դեպի Հայաստան ավիատոմսերի ծախսերը մասնակիցն հոգում է ինքնուրույն:

Դպրոցը կազմակերպվում է Հայ-Ռուսական համալսարանի քաղաքագիտության ամբիոնի և «Ձևափոխվող ինքնությունները որպես քաղաքագիտական հետազոտության հիմնախնդիր (Հարավային Կովկասի պետությունների օրինակով)» հետազոտական խմբի կողմից (ՀՀ ԿԳՄՍՆ Բարձրագույն կրթության և գիտության կոմիտեի ֆինանսավորմամբ): Միջոցառման գործընկերն է Հարավային դաշնային համալսարանը (Դոնի Ռոստով):