Ռուս-Հայկական համալսարանը ստացել է պետական ինստիտուցիոնալ հավատարմագրման վկայական՝ վեց տարի ժամկետով։ Սա հավատարմագրման ընթացակարգով նախատեսված առավելագույն ժամկետն է։

Փաստաթղթի պաշտոնական հանձնման արարողությունը տեղի է ունեցել հոկտեմբերի 3-ին՝ ՌՀՀ ղեկավարության և «Մասնագիտական կրթության որակի ապահովման ազգային կենտրոն» հիմնադրամի (ANQA) ներկայացուցիչների հանդիպման ընթացքում։ Հանդիպմանը մասնակցել են կենտրոնի տնօրեն Ռուբեն Թոփչյանը և ինստիտուցիոնալ ու ծրագրային փորձաքննության բաժնի ղեկավար Վարդուհի Գյուլազյանը։ Վկայականը հանձնվել է համալսարանի ռեկտոր Էդվարդ Սանդոյանին։

Առավելագույն ժամկետով հավատարմագրումը վկայում է ՌՀՀ-ի կրթական, գիտական և կառավարման գործունեության բարձր մակարդակի, ինչպես նաև համալսարանի որակի ապահովման ներքին համակարգի՝ ազգային չափանիշներին և չափորոշիչներին համապատասխանության մասին։

Հանդիպման ընթացքում կողմերը քննարկել են Հայաստանի բարձրագույն կրթության զարգացման արդի հարցերը և կրթության որակի ապահովման ոլորտի ժամանակակից միտումները։ Առանձնահատուկ ուշադրություն է դարձվել հավատարմագրման արդյունքներով համալսարանի հետագա անելիքներին, փորձագիտական խմբի առաջարկությունների իրականացմանը և կրթական ծրագրերի առաջիկա հավատարմագրմանը նախապատրաստվելուն։

ՌՀՀ ղեկավարությունը շնորհակալություն է հայտնել ANQA-ի ներկայացուցիչներին հավատարմագրման գործընթացի բոլոր փուլերում ցուցաբերած մասնագիտական և կառուցողական համագործակցության համար։ Ռեկտոր Էդվարդ Սանդոյանը նշել է, որ արձանագրված արդյունքը համալսարանի պրոֆեսորադասախոսական կազմի, աշխատակիցների և ուսանողների համատեղ աշխատանքի արդյունքն է։

ՌՀՀ-ն մտադիր է շարունակել որակի մշակույթի զարգացման, կրթական ծրագրերի կատարելագործման և հայկական ու միջազգային կրթական տարածքում իր դիրքերի ամրապնդմանն ուղղված հետևողական աշխատանքը։