Հայ-Ռուսական համալսարանի շրջանավարտ Հերմինե Բերբերյանը Նիդերլանդների Գրոնինգենի համալսարանում պաշտպանել է «Իմացական-ճանաչողական (կոգնիտիվ) փուլերի հայտնաբերում և հոգեվերլուծություն․ տարբեր առաջադրանքներում հիմնական փուլերի հայտնաբերում՝ մեքենայական ուսուցման կիրառմամբ, որը կիրառվում է EEG-ի և MEG-ի համար» (Cognitive Stage Detection and Interpretation: Discovering the Underlying Stages in Various Tasks Using Machine Learning Applied to EEG and MEG) թեմայով թեկնածուական ատենախոսությունը (PhD)։ 

Անդրադառնալով իր թեկնածուական թեզին՝ նա պարզաբանել է, որ իր ատենախոսական հետազոտությունը հոգեբանության, նեյրոգիտության, մաթեմատիկայի և մեքենայական ուսուցման մի յուրօրինակ սիմբիոզ է: «Ստացված արդյունքները կարող են օգտագործվել տարբեր ոլորտներում․ օրինակ, տարբեր փաստերի ուսուցման արդյունավետությունը բարելավելու համար կամ հնարավոր է նկարագրել ավելի արդյունավետ կամ պակաս արդյունավետ ուսուցման փուլերը։ Իսկ հետագայում նաև հնարավոր է օպտիմալացնել ուսումնական ծրագիրն՝ ավելի արագ կամ երկարաժամկետ մտապահման համար»,- նշել է Բերբերյանը։

Նա շեշտել է, որ իր ուսումնառությունը Հայ-Ռուսական համալսարանում միանշանակ օգնել է իր կայացմանը և նպաստել հաջողություններին։ «ՀՌՀ-ն գիտելիքների ամուր հիմք է դրել հոգեբանության տարբեր ոլորտներում, որը թույլ է տալիս հանգիստ սովորել և աշխատել տարբեր երկրներում։ Ինձ շատ օգնեցին նաև հարազատ բուհում մաթեմատիկայի, ծրագրավորման և օտար լեզուների գծով ստացած գիտելիքները»,- ընդգծել է Հերմինե Բերբերյանը՝ հավելելով, որ ՀՌՀ-ի ռեկտոր, պրոֆեսոր Արմեն Դարբինյանի դասախոսությունների ընթացքում ստացած կարևոր արժեքային հիմքերը նպաստել են իր անձնային զարգացմանը և կրեատիվ մտածողությանը:  

 

Նշենք, որ Գրոնինգենի համալսարանը հիմնադրվել է 1614թ․-ին և դասվում է աշխարհի լավագույն համալսարանների շարքին (66-րդն է Academic Ranking of World Universities վարկանիշում, 75-րդը՝ World University Rankings 2023-ում):