Սեպտեմբերի 13-ին ՀՌՀ Արևելագիտության ինստիտուտում տեղի ունեցավ «Հինդիները Արևելքից Արևմուտք» գիտաժողովը, որը նվիրված էր Հինդիի միջազգային օրվան (հինդի դիվա): Գիտաժողովը համախմբել էր հայտնի գիտնականների Հնդկաստանից, Ռուսաստանից և Հայաստանից՝ քննարկելու հինդիի դերը ժամանակակից աշխարհում, նրա ազդեցությունը մի շարք մշակույթների վրա, ինչպես նաև հնդկական կինոյի դերը հինդիի հանրահռչակման գործում և այլն։

Միջոցառումը բացեցին ՀՌՀ ԱԻ տնօրեն, պրոֆեսոր Գառնիկ Ասատրյանը, ՀՌՀ միջազգային համագործակցության գծով պրոռեկտոր Սերգեյ Կապինոսը և Կարմա Դեվի Սմրիտի համալսարանի պրոֆեսոր Մուկեշ Կումար Միշնան։

«Մենք հուսով ենք, որ այս գիտաժողովը կդառնա հինդի լեզվի հանրահռչակմանն ուղղված գիտաժողովների շարքի մեկնարկային կետը: Դա հատկապես կարևոր է մեզ համար, քանի որ Հայաստանում հինդուաբանությունը երբեք չի եղել արևելագիտության ավանդական ոլորտ ի տարբերություն այնպիսի առարկաների, ինչպիսիք են իրանագիտությունը, թյուրքագիտությունը կամ արաբագիտությունը: Մենք միայն ճանապարհորդության սկզբում ենք, և հինդուաբանության որպես գիտական ուղղություն, ինչպես նաև հինդի լեզվի և հնդկական մշակույթի հանրահռչակումը, որն ամենահինն ու ամենահարուստներից մեկն է և զգալի ազդեցություն է ունեցել հարևան ժողովուրդների մշակույթների վրա, մեր ինստիտուտի հիմնական խնդիրներից է», - շեշտեց տիկին Առաքելովան:

Նա ընդգծեց, որ դոկտոր Արորա Կումարի Սանտոշը, ով երկար տարիներ է նվիրել հինդի դասավանդմանը և հնդկական մշակույթի հանրահռչակմանը, առանցքային դեր է խաղացել համաժողովի կազմակերպման գործում:

Միջոցառման շրջանակներում մասնակիցները քննարկեցին նաև Ռուսաստանում հնդ-արիական լեզուների ուսուցման պատմությունը, հինդի և հայերենի դարձվածաբանական զուգահեռները և այլն:

Նշենք, որ գիտաժողովը կազմակերպել են ՀՌՀ ԱԻ-ն և Բաստիի Կարմա Դեվի համալսարանը։