Ռուս-Հայկական համալսարանի Տնտեսագիտության և բիզնեսի ինստիտուտի աշխատակիցները մասնակցեցին «Ռուսաստանի տնտեսության արդիականացում. շարժընթաց, առաջնահերթություններ և նոր մարտահրավերներ» կլոր սեղանին, որը նվիրված էր տնտեսագիտության դոկտոր, պրոֆեսոր, Ռուսաստանի գիտությունների ակադեմիայի թղթակից անդամ Դմիտրի Եվգենիի Սորոկինի հիշատակին։ Կլոր սեղանը կազմակերպվել էր ՌԳԱ Տնտեսագիտության ինստիտուտի, Ռուսաստանի Դաշնության Կառավարությանն առընթեր Ֆինանսական համալսարանի և Ազատ տնտեսագիտական ընկերության կողմից մարտի 19-ին։

Կլոր սեղանը նվիրված էր ականավոր գիտնականի 80-ամյակին։ Միջոցառման ընթացքում մասնակիցները կիսվեցին Դմիտրի Եվգենիի և նրա գիտական ժառանգության մասին իրենց հիշողություններով։

ՌՀՀ ռեկտոր, տնտեսագիտության դոկտոր, պրոֆեսոր Էդվարդ Սանդոյանը խոսեց Դմիտրի Սորոկինի անգնահատելի դերի մասին Ռուս-Հայկական համալսարանի և, մասնավորապես, Տնտեսագիտության և բիզնեսի ինստիտուտի կյանքում և զարգացման գործում: Նա խոսեց Ռուս-Հայկական համալսարան կատարած իր այցելությունների, ինստիտուտի գիտական դպրոցի զարգացման գործում ունեցած ներդրման, ուսումնական գործընթացի կատարելագործման և հարստացման մասին: 

 

Էդվարդ Սանդոյանը պատմեց նաև 2022 թվականին Դմիտրի Սորոկինի անվան լսարանի բացման մասին, որը կոչված է նրա հիշատակի հավերժացմանը: 2022 թվականից լսարանը դարձել է ինստիտուտի ամենակարևոր գիտական և կրթական միջոցառումների անցկացման վայր, սակայն, նախ և առաջ, այն դարձել է հիշողության վայր. այստեղ են պահվում Դմիտրի Եվգենիևիչի կյանքի տարբեր փուլերի, այդ թվում՝ նրա Հայաստանում անցկացրած օրերը պատկերող լուսանկարները, նրա փառահեղ կյանքը ներկայացնող ստենդերը, ինչպես նաև անվանի գիտնականի հեղինակած գրքերն և գիտական աշխատանքները: