РОССИЙСКО-АРМЯНСКИЙ УНИВЕРСИТЕТ

12 Հու
2023

ՀՌՀ ուսանողները ճանաչողական այց են կատարել ՀՀ արտաքին գործերի նախարարություն

Ուսանողներին ներկայացվել է ՀՀ ԱԳՆ շենքը, դիվանագիտական դպրոցը, նախարարության կառուցվածքը և գործառույթները։

Հայ-Ռուսական համալսարանի «Միջազգային հարաբերություններ» և «Տարածաշրջանագիտություն» ուղղությունների ուսանողները ճանաչողական այցի շրջանակներում հուլիսի 7-ին այցելել են ՀՀ արտաքին գործերի նախարարություն։

Ուսանողներին ներկայացվել է ՀՀ ԱԳՆ շենքը, դիվանագիտական դպրոցը, նախարարության կառուցվածքը և գործառույթները։ Հատկանշական է, որ ճանաչողական այցը մեր ուսանողների համար անցկացրել է ՀՌՀ-ի շրջանավարտ, ՀՌՀ-ի Համաշխարհային քաղաքականության և միջազգային հարաբերությունների ամբիոնի ասպիրանտ, ՀՀ ԱԳՆ աշխատակից Մերի Ադամյանը։

«Ես կարծում եմ, որ քաղաքականությամբ հետաքրքրվող ցանկացած ուսանող երազում է հայտնվել ՀՀ արտաքին գործերի նախարարության շենքում, որտեղ ինչ-որ իմաստով կերտվում է մեր երկրի պատմությունը։ Հիշում եմ շենքի ներսում տիրող անմոռանալի մթնոլորտը, այն վայրի զգացողությունը, որտեղ կցանկանայի աշխատել հետագայում։ Արտաքին գործերի նախարարության շենքում զգում ես անցյալը և դրա կապը ներկայի հետ։ Ցանկանում եմ շնորհակալություն հայտնել Մերի Ադամյանին այդ շենքում շրջելու, շարժառիթի, հետագայի համար տված խորհուրդների և մեր բոլոր հարցերին սպառիչ պատասխաններ տալու համար։ Շնորհակալություն եմ հայտնում նաև Հայ-Ռուսական համալսարանին՝ այդ այցը կազմակերպելու համար», - նշել է ՀՌՀ-ի «Միջազգային հարաբերություններ» ուղղության առաջին կուրսի ուսանող Ռոզ Իզաբել Սարգսյանը։

Նշենք, որ ՀՀ դիվանագիտական ծառայության կազմակերպման, ղեկավարման, դիվանագիտական ծառայության մարմինների գործունեության մասին հանրության իրազեկվածության բարձրացման նպատակով, ՀՀ արտաքին գործերի նախարարությունը կազմակերպում է ուսումնաճանաչողական այցեր՝ Հայաստանի, Արցախի և օտարերկրյա պետությունների բուհերի ուսանողների ու պրոֆեսորադասախոսական կազմի համար: