Ռուս-հայկական համալսարանում շարունակվում է հոգեբանության ոլորտում վարպետության դասերի և թրենինգային պարապմունքների շարքը, որոնք ուղղված են ուսանողների գործնական հմտությունների զարգացմանը և նրանց մասնագիտական մտածողության ձևավորմանը։ Հերթական հանդիպումը նվիրված էր ինքնաճանաչման և ներքին ներդաշնակության թեմային՝ «Իմ ներքին աշխարհը» խորագրով վարպետության դասը տեղի ունեցավ ՌՀՀ-ում ապրիլի 3-ին։

Պարապմունքը նվիրված էր մարդու ներքին աշխարհի և ինքնաճանաչման մեխանիզմների ուսումնասիրությանը։ Վարպետության դասի ընթացքում մասնակիցները ներգրավվեցին արխետիպային դերերի հետ աշխատանքում, փորձեցին իրենց նայել նոր տեսանկյունից և ավելի լավ հասկանալ ներքին գործընթացները, որոնք ազդում են նրանց վարքագծի և կյանքի որոշումների վրա։

Վարպետության դասը վարեց հայտնի հոգեբան Արմինե Ավագյանը՝ Գեշտալտ թերապիայի եվրոպական ասոցիացիայի և Համառուսաստանյան մասնագիտական հոգեթերապևտական լիգայի լիիրավ անդամ, «Աճ» անձի և բիզնեսի զարգացման կենտրոնի տնօրենը։

Միջոցառումը բացելով՝ ՌՀՀ հոգեբանության ամբիոնի վարիչ, պրոֆեսոր Ասյա Բերբերյանը ընդգծեց հոգեբանության կարևորությունն ու արդիականությունը ժամանակակից հասարակությունում։ Նրա խոսքով՝ տարեցտարի աճում է որակյալ մասնագետների պահանջարկը, որոնք պետք է ոչ միայն ունենան հիմնարար գիտելիքներ, այլև կարողանան դրանք կիրառել գործնականում՝ կրթության, առողջապահության և սոցիալական ոլորտներում։