Հայ-Ռուսական համալսարանի պատվիրակությունը «NanoQIQO Horizon 2020 Twinning» նախագծի շրջանակներում ապրիլի 3-6-ն աշխատանքային այցով այցելել է Պատրասի համալսարան (Հունաստանի Հանրապետություն)։ 

ՀՌՀ-ի պատվիրակությունը (ՀՌՀ-ի կայքի գլխավոր խմբագիր Մարիամ Թորգոմյան, ՀՌՀ-ի Ընդհանուր ֆիզիկայի և քվանտային նանոկառուցվածքների ամբիոնի ավագ գիտաշխատող Արտավազդ Կոստանյան, ֆիզիկամաթեմատիկական գիտությունների թեկնածու Յուրի Բլեյան, ՀՌՀ-ի միջազգային համագործակցության վարչության աշխատակիցներ Անուշ Բրուտյան և Լիլիթ Վայրադյան, ՀՌՀ-ի միգրացիոն և զորակոչային հաշվառման բաժնի ղեկավար Սիլվի Ադիկյան, ինչպես նաև ՀՌՀ-ի Ընդհանուր ֆիզիկայի և քվանտային նանոկառուցվածքների ամբիոնի ուսանողներ և ասպիրանտներ) գլխավորել է Հայ-Ռուսական համալսարանի Ընդհանուր ֆիզիկայի և քվանտային նանոկառուցվածքների ամբիոնի վարիչ, «NanoQIQO Horizon 2020 Twinning» նախագծի համակարգող Դավիթ Հայրապետյանը։ 

Նշենք, որ «NanoQIQO Horizon 2020 Twinning» նախագիծը հիմք է հանդիսանում Հայաստանում նանոնյութերի հետազոտությանը՝ քվանտային ինֆորմատիկայում և քվանտային օպտիկայում կիրառելու նպատակով։ Թվինինգ ծրագիրը հնարավորություն է ընձեռում ընդլայնելու գիտության և տեխնոլոգիաների կարողությունները, բարելավելու հաստատության վարչական կազմի որակավորման մակարդակը, ինչպես նաև նպաստում գիտակրթական գործընթացների միջազգայնացմանը: Այն օգնում է բարձրացնել նաև հայտատու երկրի, հաստատության, ինչպես նաև թիմի գիտահետազոտական պրոֆիլը։

«Սա մեր առաջին այցելությունը չէ Պատրասի համալսարանը․ անցած տարի ապրիլին մեր աշխատակիցներն այնտեղ անցկացրել են մի շարք արդյունավետ հանդիպումներ։ Եվ անցած տարվա այցելության ընթացքում մենք ստորագրել էինք Հայ-Ռուսական համալսարանի և Պատրասի համալսարանի միջև փոխըմբռնման հուշագիրը և «Համատեղ ասպիրանտական ծրագրերի ներդրման մասին» համաձայնագիրը», - նշել է Դավիթ Հայրապետյանը՝ հավելելով, որ այցելության ընթացքում կողմերը քննարկել են արդեն իսկ կատարված աշխատանքները և նախանշել համագործակցության հետագա փուլերը և առաջիկա ծրագրերը։ ՀՌՀ-ի գիտական աշխատողները և վարչական կազմի աշխատակիցները ծանոթացել են Պատրասի համալսարանի ներուժին և իրականացրել փորձի փոխանակում։ 

Բացի այդ՝ այցի ընթացքում տեղի է ունեցել ՀՌՀ-ի մագիստրատուրայի երկրորդ կուրսի ուսանող Գրիգոր Մանթաշյանի մագիստրոսական թեզի նախապաշտպանությունը, որի համաղեկավարն է հանդիսանում Պատրասի համալսարանի պրոֆեսոր, ՀՌՀ-ի պատվավոր դոկտոր Սատիրիոս Բասկուտասը, իսկ Հայ-Ռուսական համալսարանի կողմից թեզի համաղեկավարը ՀՌՀ-ի Ընդհանուր ֆիզիկայի և քվանտային նանոկառուցվածքների ամբիոնի վարիչ Դավիթ Հայրապետյանն է։

Հիշեցնենք, որ 2020թ․ մարտին Հայ-Ռուսական համալսարանը ճանաչվել էր Հորիզոն 2020 Թվինինգ ծրագրի հաղթող։