Հայ-Ռուսական համալսարանի Արևելագիտության ինստիտուտի ներկայացուցիչները մասնակցել են «Քրիստոնեությունը Հյուսիսային Կովկասում․ պատմությունը, մշակույթը, ժամանակակից հասարարակությունը» խորագրով միջազգային գիտական կոնֆերանսին, որը կայացել է սեպտեմբերի 22-25-ը Վլադիկավկազում՝ Ռուսաստանի գիտությունների ակադեմիայի Վլադիկավկազի գիտական կենտրոնի Հումանիտար և սոցիալական հետազոտությունների Հյուսիսային Օսիայի ինստիտուտում՝ Հյուսիսային Օսիայի կառավարության և Ռուս ուղղափառ եկեղեցու Վլադիկավկազի և Ալանիայի թեմի գործուն աջակցությամբ։ 

 

Որպես պատվավոր հյուրեր և բանախոսներ իրենց զեկույցներն են ներկայացրել ՀՌՀ-ի Արևելագիտության ինստիտուտի տնօրեն Գառնիկ Ասատրյանը, նույն ինստիտուտի պրոֆեսոր Վիկտորիա Առաքելովան և Հայկ Հակոբյանը։ 

 

«Մեր այցելության ընթացքում կառուցողական աշխատանքային հանդիպումներ ենք ունեցել օսեթ գործընկերների հետ։ Այժմ արդյունավետ համագործակցության համար դրված է նաև ինստիտուցիոնալ բազա․ ՀՌՀ-ի և Ռուսաստանի գիտությունների ակադեմիայի Վլադիկավկազի գիտական կենտրոնի հետ ստորագրվել է համագործակցության հուշագիր։ Ընթացիկ տարվա նոյեմբերին Երևան կայցելի Հյուսիսային Օսիայի ինստիտուտի պատվիրակությունը, որի ընթացքում նախատեսվում է հուշագրի ստորագրում նաև այդ կառույցի հետ։ Մենք չենք բացառում, որ օսեթագիտությունը կարող է ներառվել մեր կրթական ծրագրերի մեջ՝ կովկասագիտության ուսումնասիրության շրջանակներում»,- նշել է ՀՌՀ-ի Արևելագիտության ինստիտուտի պրոֆեսոր Վիկտորիա Առաքելովան՝ հավելելով, որ օսեթ գործընկերներին շատ հետաքրքրել է ՀՌՀ-ի Արևելագիտության ինստիտուտի կրթական ծրագրերը, ինչպես նաև գիտական, կրթական և հրատարակչական գործունեությունը։ 

 

Նշենք, որ վերոնշյալ կոնֆերանսին մասնակցել են նաև Մոսկվայի, Սանկտ Պետերբուրգի և Ռուսաստանի Դաշնության այլ քաղաքների պրոֆիլային ակադեմիական ինստիտուտների և բուհերի գիտնականներ, ինչպես նաև Ռուս ուղղափառ եկեղեցու ներկայացուցիչներ։