РОССИЙСКО-АРМЯНСКИЙ УНИВЕРСИТЕТ

17 Սեպ
2026

Հայկական համալսարանների ուսանողները մասնակցեցին ՌՀՀ օրվան նվիրված մարզական մրցումներին

Բուհում անցկացվել են մարզաժամանցային միջոցառումներ՝ պարանի ձգում և բազկամարտ։

Ռուս-Հայկական համալսարանի օրվա շրջանակում սեպտեմբերի 15-ին բուհում անցկացվել են մարզաժամանցային միջոցառումներ՝ պարանի ձգում և բազկամարտ։

Բազկամարտի կանանց մրցապայքարում I տեղը զբաղեցրել է Ռուս-Հայկական համալսարանի Լրագրության բաժնի ուսանողուհի Լիանա Ալավերդյանը, II՝ Միջազգային հարաբերությունների բաժնի ուսանողուհի Արփինե Խաչատրյանը, իսկ III տեղը՝ ՌՀՀ «Ուսմունք» դպրոցի աշակերտուհի Մարիամ Ավետիսյանը։

Լիանա Ալավերդյանի խոսքով՝ համալսարանական միջոցառումներին մասնակցությունը ուսանողներին հնարավորություն է տալիս ոչ միայն ակտիվորեն ներգրավվել համալսարանական կյանքում, այլև բացահայտել ու ներկայացնել իրենց տաղանդներն ու կարողությունները։

«Շատ ուրախալի է, որ համալսարանը մեզ նման հնարավորություններ է տալիս։ Բացի հիմնական դասերից, սիրով մասնակցում ենք տարբեր միջոցառումների։ Դրանք լավ հնարավորություն են՝ բացահայտելու մեր տաղանդները, նոր փորձ ձեռք բերելու և ինքնադրսևորվելու», - կիսվել է նա:

Տղամարդկանց պայքարում հաղթող է ճանաչվել Հայաստանի ֆիզիկական կուլտուրայի և սպորտի պետական ինստիտուտի ներկայացուցիչ Նարեկ Նազարյանը։ II և III տեղերը համապատասխանաբար զբաղեցրել են ՌՀՀ-ի ուսանողներ Սիմոն Աբրահամյանը և Դրաստամատ Մալումյանը։

Պարանի ձգման թիմային մրցույթում I տեղը զբաղեցրել է ՌՀՀ Մաթեմատիկայի, ֆիզիկայի և բարձր տեխնոլոգիաների ինստիտուտի թիմը։ II տեղում Տնտեսագիտության և բիզնեսի ինստիտուտի թիմն է, իսկ III տեղում՝ Իրավունքի ինստիտուտի թիմը։

Ինչպես նշել է ՌՀՀ Ֆիզիկական դաստիարակության և առողջ ապրելակերպի ամբիոնի վարիչ, մ.գ.դ. Արմեն Գրիգորյանը, պարանի ձգման մրցույթը ուսանողների շրջանում մեծ արձագանք է գտնում։

«Հաշվի առնելով մեր համալսարանի ուսանողների ակտիվ ներգրավվածությունը՝ պարանի ձգման մրցույթն անցնում է բավականին աշխույժ մթնոլորտում։ Արդեն մի քանի տարի է՝ կազմակերպում ենք պարանի ձգման և ձեռքի ուժի առաջնություններ, որոնք հաջողությամբ են անցկացվում և մեծ հետաքրքրություն են առաջացնում մասնակիցների շրջանում։ Մրցաձևերի ընտրությունը կատարել ենք ուսանողների շրջանում անցկացված ոչ պաշտոնական հարցման միջոցով՝ պարզելու, թե որ մարզաձևերն են նրանք ցանկանում տեսնել համալսարանական միջոցառումների ընթացքում», – նշել է Արմեն Գրիգորյանը։

Մրցումներն անցել են ակտիվ և մրցակցային մթնոլորտում՝ համախմբելով համալսարանի տարբեր ինստիտուտների ուսանողներին և ձևավորելով մարզական ու թիմային ոգի։