РОССИЙСКО-АРМЯНСКИЙ УНИВЕРСИТЕТ

19 Ապր
2023

ՀՌՀ-ում մեկնարկել է Ուսանողական ամենամյա գիտաժողովը

Զեկույցներով հանդես են գալու 250 մասնակիցներ, ինչպես նաև մոտ 50 զեկույցներ կլինեն ՀՀ, ՌԴ և Բելառուսի առաջատար բուհերից։

Հայ-Ռուսական համալսարանում ապրիլի 17-ին մեկնարկել է ՀՌՀ ուսանողական ամենամյա գիտաժողովը, որի ընթացքում զեկույցներով հանդես են գալու 250 մասնակիցներ, ինչպես նաև մոտ 50 զեկույցներ կլինեն ՀՀ, ՌԴ և Բելառուսի առաջատար բուհերից։

«Զեկույցների որակով ուսանողներն արդեն սկսել են մրցակցել պրոֆեսորների հետ։ Ես կարծում եմ, որ չկա առավել գեղեցիկ բան, քան գիտությամբ զբաղվող աղջիկը կամ տղան։ Դա ընդգծում է լրջությունը, հիմնարարությունը և հավակնոտությունն աշխարհում սեփական բարի համբավի ձևավորման համար», - իր ողջույնի խոսքում նշել է Հայ-Ռուսական համալսարանի ռեկտոր, պրոֆեսոր Արմեն Դարբինյանը։

Նրա դիտարկմամբ՝ առանց գիտական մոտեցման ամեն ինչ ձախողվում է, այդ թվում՝ տնտեսությունը և քաղաքականությունը։ «Ցանկացած երկրում հաջողված կառավարման համակարգը ուղղակիորեն կախված է գիտական մոտեցումներից։ Այդ իսկ պատճառով կարևոր է երիտասարդության մեջ սերմանել սեր հիմնարար գիտելիքների նկատմամբ», - ընդգծել է Դարբինյանը։

Իր հերթին՝ ՀՌՀ-ի գիտական գծով պրոռեկտոր Պարգև Ավետիսյանն իր բացման խոսքում ասել է հետևյալը․

«Գիտաժողովը մեր գիտական գործունեության կարևորագույն լոկոմոտիվն է։ Հաճելի է տեսնել տարբեր ուղղությունների գծով մեծ քանակությամբ բովանդակալից զեկույցներ»:

Նշենք, որ գիտաժողովի բացմանը ուսանողները հանդես են եկել զեկույցներով և մասնագետների հետ քննարկել ժամանակակից գիտության արդիական խնդիրները։

Հիշեցնենք նաև, որ ՀՌՀ-ի ուսանողական ամենամյա գիտաժողովն ավանդականորեն անցկացվում է ֆիզիկամաթեմատիկական, բնագիտական, հասարակագիտական և հումանիտար գիտական ուղղություններով: