РОССИЙСКО-АРМЯНСКИЙ УНИВЕРСИТЕТ

17 Ապր
2025

ՌՀՀ-ում կայացավ մրցույթ-վիկտորինա՝ «Իրավունքի հիմունքներ» առարկայից

Վիկտորինային մասնակցում էին Ռուս-Հայկական համալսարանի և Հայաստանում Ֆրանսիական համալսարանի «Իրավագիտություն» մասնագիտության ուսանողները:

Ապրիլի 16-ին Ռուս-Հայկական համալսարանի Իրավունքի ինստիտուտի Իրավունքի տեսության և սահմանադրական իրավունքի ամբիոնի կողմից կազմակերպվեց մրցույթ-վիկտորինա՝ «Իրավունքի հիմունքներ» առարկայից։

Վիկտորինային մասնակցում էին Ռուս-Հայկական համալսարանի և Հայաստանում Ֆրանսիական համալսարանի «Իրավագիտություն» մասնագիտության 1-ին կուրսի ուսանողները: Մասնակցում էին 6 թիմ, յուրաքանչյուրի կազմում 5 հոգի:

Թիմերը պատասխանեցին առաջադրված հարցերին, լուծեցին խաչբառ, այնուհետև հաջորդ փուլում՝ իրավիճակային խնդիր: Արդյունքում հաղթող ճանաչվեց Հայաստանում Ֆրանսիական համալսարանի առաջին թիմը։ Երկրորդ տեղը զբաղեցրեց նույն համալսարանի երկրորդ թիմը, իսկ երրորդ տեղը զբաղեցրեց Ռուս-Հայկական համալսարանի Իրավունքի ինստիտուտի թիմը։

1-ին, 2-րդ և 3-րդ տեղ զբաղեցրած թիմերի անդամները պարգևատրվեցին երկու բուհերի համատեղ պատվոգրերով։ Դասավանդող դասախոսներ պրոֆեսսոր Ա.Ղամբարյանը և դոցենտ Հ.Ստեփանյանը նվիրեցին իրենց հեղինակած «Պետության և իրավունքի տեսություն» ուսումնական ձեռնարկի մեկական օրինակ։

Լավագույն ուսանող անվանակարգում հաղթող ճանաչվեցին Ռուս-Հայկական համալսարանի ուսանող Կարլեն Կարապետյանը և Հայաստանում ֆրանսիական համալսարանի ուսանող Անի Դարբինյանը։

Նշենք, որ կազմակերպիչներ Ա․Ղամբարյանի և Հ․Ստեփանյանի հրավերով ժյուրիի կազմում ընդգրկված էին ի.գ.թ. Ս. Պետիկյանը և փ.գ.թ., դոցենտ Մ․Քալաշյանը։ Ժյուրիի անդամները շեշտեցին, որ նման միջոցառումները շատ կարևոր են ուսուցման կազմակերպման գործընթացում, ուսանողների մոտիվացիայի բարձրացման համար և հույս հայտնեցին, որ նման միջոցառումները շարունակական կլինեն։