РОССИЙСКО-АРМЯНСКИЙ УНИВЕРСИТЕТ

20 Փետ
2026

ՌՀՀ-ում մեկնարկել է Բժշկական քրեական իրավունքի ձմեռային դպրոցը

Ձմեռային դպրոցը բացեց Քրեական իրավունքի և քրեական դատավարության իրավունքի ամբիոնի դոցենտ Արմեն Գուկասյանը՝ ուսանողների հետ քննարկելով բժշկական աշխատողների կողմից կատարվող հանցագործությունների կանխարգելման արդիական խնդիրները։

Փետրվարի 20-ից Ռուս-Հայկական համալսարանում մեկնարկեց Բժշկական քրեական իրավունքի ամենամյա ձմեռային դպրոցը, որը կազմակերպվում է ՌՀՀ Իրավունքի ինստիտուտի Քրեական իրավունքի և քրեական դատավարության իրավունքի ամբիոնի կողմից՝ ՌՀՀ Կենսաբժշկության և դեղագործության ինստիտուտի Կենսաինժեներիայի, կենսաինֆորմատիկայի և մոլեկուլային կենսաբանության ամբիոնի հետ համատեղ։

Դպրոցի շրջանակներում ամբիոնի դասախոսները, Մխիթար Հերացու անվան Երևանի պետական բժշկական համալսարանի հրավիրված փորձագետները, ինչպես նաև երիտասարդ հետազոտողները կներկայացնեն յատրոգեն հանցագործությունների համար քրեական պատասխանատվությունը, օրգանների, հյուսվածքների և բջիջների փոխպատվաստման ոլորտում առաջացող կենսաէթիկական և քրեաիրավական խնդիրները, ինչպես նաև բժշկական քրեական իրավունքի այլ արդիական հարցերը։

Նշենք, որ դպրոցը կշարունակվի մինչև փետրվարի 28-ը։ Ավարտին մասնակիցներին կհանձնվեն հավաստագրեր։