Ռուս-Հայկական համալսարանի դասախոսներն ու մագիստրանտները մասնակցել են ռուսաց լեզվի և ռուսերենով դասավանդվող առարկաների ուսուցիչների և դասախոսների II միջազգային համաժողովին՝ «Երկլեզու կրթությունն այսօր․ գլոբալ մարտահրավերներ և արդյունավետ փորձ» խորագրով։ Համաժողովը կայացել է սեպտեմբերի 28–29-ը Բիշքեկում՝ Բ. Ելցինի անվան Ղրղզա-Ռուսական Սլավոնական համալսարանում։

Միջոցառումը համախմբել է Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և ԱՊՀ այլ երկրների մանկավարժների, դասախոսների, լեզվաբանների, մեթոդիստների և փորձագետների։ Համաժողովի ծրագիրն ընդգրկել է լիագումար նիստեր, ռազմավարական քննարկումներ, թեմատիկ առկա և առցանց նիստեր, կլոր սեղաններ, վարպետության դասեր, փորձագիտական դասախոսություններ և մասնագիտական վերապատրաստման դասընթացներ։ Առանձնահատուկ հետաքրքրություն է առաջացրել երիտասարդ հետազոտողների «Գիտությունը երիտասարդներին» համաժողովը։

Այս տարի Ռուս-Հայկական համալսարանը ներկայացրել են դասախոսներ և ուսանողներ՝ մասնակցելով ինչպես առկա, այնպես էլ առցանց ձևաչափերով։ Պատվիրակության կազմում էին ՌՀՀ-ի բանասիրության և միջմշակութային հաղորդակցության ինստիտուտի տնօրեն, պրոֆեսոր Նինա Տատկալոն, ռուսաց լեզվի և մասնագիտական հաղորդակցության ամբիոնի վարիչ, Ռուսագիտության կենտրոնի ղեկավար Կարեն Հակոբյանը, տնտեսագիտության տեսության և անցումային շրջանի տնտեսության հիմնախնդիրների ամբիոնի վարիչ Իրինա Պետրոսյանը, Կ. Միրումյանի անվան քաղաքագիտության ամբիոնի վարիչ Հովհաննես Սարգսյանը, դասախոսներ Արշակ Սարգսյանն ու Ստեփան Մանթարյանը, ինչպես նաև բանասիրության մագիստրանտներ Իդա Դավթյանն ու Մանյա Հովակիմյանը։

Համաժողովի ընթացքում ՌՀՀ-ի ներկայացուցիչները հանդես են եկել զեկուցումներով՝ անդրադառնալով երկլեզու կրթության արդի հիմնախնդիրներին, ռուսաց լեզվի դասավանդման մեթոդներին, լեզվական և մշակութային առանձնահատկություններին, ինչպես նաև կրթության ոլորտում թվային տեխնոլոգիաների կիրառմանը։ Մասնակիցները ներկայացրել են նաև համալսարանի փորձը ռուսաց լեզվի տարածման, կրթական ծրագրերի կատարելագործման և մասնագիտական համագործակցության զարգացման ուղղությամբ։ Քննարկումների ընթացքում կարևորվել են ռուսերենի ուսուցման արդյունավետ մեթոդները, երկլեզու կրթական միջավայրի զարգացումը և ժամանակակից կրթական պահանջներին համապատասխան մասնագիտական կարողությունների ձևավորումը։

Համաժողովի ավարտին մասնակիցներն ընդգծել են մասնագիտական երկխոսության շարունակման և համատեղ կրթական ու հետազոտական նախագծերի իրականացման կարևորությունը։ Կազմակերպիչները նախատեսում են զարգացնել երիտասարդների գիտական համագործակցության ուղղությունը և «Գիտությունը երիտասարդներին» գիտաժողովը դարձնել համաժողովի ամենամյա հանդիպումների մշտական բաղադրիչ։

Նշենք, որ համաժողովը կազմակերպվել է Ելցինի անվան Ղրղզա-Ռուսական Սլավոնական համալսարանի և Պատրիս Լումումբայի անվան Ռուսաստանի ժողովուրդների բարեկամության համալսարանի համատեղ նախաձեռնությամբ։