Հայ-Ռուսական համալսարանի մաթեմատիկայի և մաթ․ մոդելավորման ամբիոնի վարիչ Արման Դարբինյանը Հայաստանի պատվիրակության հետ միասին սեպտեմբերի 18-ից 22-ը Փարիզում մասնակցել էր 73-րդ «Միջազգային տիեզերագնացության կոնգրես»-ին (International Astronautical Congress, https://iac2022.org/), որի կարգախոսն էր «Space for all»: Կոնգրեսը կազմակերպել էր «Միջազգային տիեզերագնացության ֆեդերացիա»-ն։

 

Միջազգային տիեզերագնացության կոնգրեսը համախմբել էր ավելի քան 40 երկրների գիտնականների և հետազոտողների, նորարարների և փորձագետների՝ ավելի քան 6500 պատվիրակության անդամների, ովքեր ներկայացնում էին տիեզերական սարքավորումների, կապի համակարգերի, տիեզերական տվյալների մշակման, արհեստական բանականության և ռոբոտատեխնիկայի վերաբերյալ արտանդրանքներ։

 

Կոնգրեսի շրջանակում ցուցադրությանը զուգահեռ նաև կոնֆերանս էր անցկացվել, որի ընթացքում զեկուցողները ներկայացնում էին տիեզերագնացությանը առընչով հետազոտության արդյունքները։

 

Ինչպես ընդգծեց Արման Դարբինյանը, այս տարի առաջին անգամ Հայաստանը, բարձր տեխնոլոգիական արդյունաբերության նախարարության գլխավորությամբ, մասնակցեց այս միջոցառմանը․ «Մենք ունեինք մեր տաղավարը, որտեղ ներկայացնում էինք Հայաստանում տիեզերագնացության ոլորտում ունեցած արդյունքները և կատարվող հետազոտությունները։ Քանի որ Հայաստանը արդեն ունի իր արբանյակն երկրի ուղեծրում, ապա դա տալիս է լայն հնարավորություններ տեղում ոլորտը զարգացնելու համար»։

 

Միջազգային տիեզերագնացության կոնգրեսը տիեզերական առաջնակարգ իրադարձություն է աշխարհում: Սա եզակի միջացառում է, անգերազանցելի իր ծավալով և հաճախելիությամբ: Աշխարհի տիեզերական գործակալությունների և կազմակերպությունների ներկայացուցիչներ հավաքվում են մեկ հարկի տակ՝ փոխանակելու տեղեկատվություն և գաղափարներ, կիսվելու զարգացումներով և ձեռքբերումներով, ռազմավարություններով և նոր միտումներով:

 

Խոսելով գիտական համագործակցության մասին՝ Արման Դարբինյանն ասաց, որ կոնգրեսի ընթացքում հանդիպել է այս ոլորտի առաջատար ներկայացուցիչների, այդ թվում՝ տեղի հայ համայնքի գիտական ներկայացուցիչների հետ, ներկայացրել Հայ-Ռուսական համալսարանում կատարվող հետազոտությունները, գործող հետազոտական լաբորատորիաները և ՀՌՀ նոր «Ավտոնոմ համակարգեր և ռոբոտատեխնիկա» մագիստրոսական ծրագրերի փաթեթը։

 

«Հույս ունեմ, որ ստեղծված կապերը կտան հնարավորություն Հայաստանում զարգացնելու այս ոլորտը և մեր արտասահմանյան գործընկերների հետ համատեղ արդյունքներ ստանալու համար։ Միջազգային տիեզերագնացության կոնգրեսը շատ կարևոր միջոցառում էր, որը կտա համապատասխան վեկտոր Հայ-Ռուսական համալսարանում, ինչպես նաև Հայաստանում տիեզերական ուղղությունը խթանելու և զարգացնելու համար»։

 

Պարոն Դարբինյանը շեշտեց, որ այս պահին Հայաստանում չկա տիեզերական «գործակալություն», որը իր շուրջ կհամախմբի համահայկական ներուժը այս ոլորտում․ «Այդ պատճառով նախնական որոշում է կայացվել ստեղծել նման կառույց, որի կայացման և զարգացման գործում նաև մեր համալսարանը կմասնակցի և կունենա ինչպես կրթական, այնպես էլ գիտահետազոտական առանցքային դեր։ Հայաստանը առաջին քայլերն է անում այս ուղղությամբ և վստահ եմ, որ ամեն ինչ դեռ առջևում է»։