Նոյեմբերի 17-ին՝ ժամը 09:00-ին, ՌՀՀ Պիոտրովսկու անվան լսարանում տեղի կունենա հանդիպում Digitain Group-ի կազմակերպական զարգացման գործադիր տնօրեն Մարիա Պետրոսյանի հետ։ Հանդիպման թեման՝ «Կարիերայի զարգացումը արհեստական բանականության դարաշրջանում»։

Մարիա Պետրոսյանը ղեկավարում է Digitain Group-ի կազմակերպական զարգացման ուղղությունը՝ ձևավորելով արագ զարգացող տեխնոլոգիական ընկերության կառուցվածքի, կառավարման և աճի ռազմավարությունը։

Ավելի քան 20 տարվա մասնագիտական փորձի ընթացքում Մարիան մարդկային ռեսուրսների կառավարման ռազմավարությունները վերածել է բիզնեսի շոշափելի արդյունքների։ Նա իր կարիերան սկսել է հյուրընկալության ոլորտում, որտեղ ղեկավարել է բուտիկ հյուրանոց։ Այնուհետև զբաղեցրել է մարդկային ռեսուրսների կառավարման և գործառնական գործունեության ղեկավար պաշտոններ տեխնոլոգիական ընկերություններում, միջազգային կորպորացիաներում և միջազգային զարգացման կազմակերպություններում։ Synopsys ընկերությունում որպես մարդկային ռեսուրսների կառավարման ավագ տնօրեն՝ նա ղեկավարել է անձնակազմի և առաջնորդության զարգացման ռազմավարությունը EMEA տարածաշրջանի 17 երկրներում։

Մարիան համոզված է, որ սովորելը դադարեցնող ղեկավարները դադարում են առաջնորդ լինել։ Նա մասնագիտական վերապատրաստում է անցել Օքսֆորդի համալսարանում, UC Berkeley-ի Haas բիզնեսի դպրոցում, Յեյլի կառավարման դպրոցում և Ամստերդամի INHOLLAND համալսարանում։ Նա նաև Korn Ferry-ի հավաստագրված քոուչ է։ Դասախոսել է Հայաստանի ամերիկյան համալսարանում, իսկ ներկայումս դասընթացներ է վարում Հայաստանի եվրոպական համալսարանում։

Միջոցառումը կազմակերպվել է ՌՀՀ Տնտեսագիտության և բիզնեսի ինստիտուտի Կառավարման և բիզնեսի ամբիոնի կողմից։