Սեպտեմբերի 27-ին Հայ-Ռուսական համալսարանի ուսանողները, դասախոսները և աշխատակիցները՝ բուհի ռեկտոր, պրոֆեսոր Էդվարդ Սանդոյանի գլխավորությամբ, ծաղիկներ խոնարհեցին Արցախյան Երկրորդ պատերազմում զոհված ՀՌՀ ուսանողների և շրջանավարտների հուշարձանին։ Միջոցառմանը ներկա էին նաև հերոսների ծնողներն ու ընկերները։

Ռեկտորի Ուսանողական գծով խորհրդական Հռիփսիմե Մարգարյանն ընդգծեց, որ մենք պետք է հարգենք մեր հերոսների հիշատակը և իմանանք նրանց անունները։
 

«ՀՌՀ ուսանողներն ամենայն հարգանքով և մեծագույն սիրով են հիշում իրենց համալսարանական ընկերներին։ Մեր այսօրվա հերոսները մեզ ուժ են տալիս հաղթահարելու այս դժվարին շրջանը», - կիսվեց Հռիփսիմե Մարգարյանը։

Ուսանողները եղան նաև Լեոնիդ Ազգալդյանի անվան լսարանում, որից հետո երթը շարունակեցին դեպի Եռաբլուր պանթեոն։

Հիշեցնենք, որ Արցախյան Երկրորդ պատերազմում զոհված Հայ-Ռուսական համալսարանի ուսանողների և շրջանավարտների հուշարձանը պատրաստել է քանդակագործ Ռոբերտ Ասկարյանը (էսքիզի հեղինակն է՝ ՀՀ վաստակավոր նկարիչ Ռուբեն Արուտչյանը):

Հավերժ հիշատակ և փառք մեր հերոսներին՝ Ալբերտ Հովհաննիսյան, Մխիթար Գալեյան, Վրեժ Ավետիսյան, Արման Աղվանյան, Էդուարդ Չիչյան, Էրիկ Ազատյան, Գագիկ Բրսոյան, Արեգ Բարսեղյան, Նորայր Մայիլյան, Տիգրան Շաշիկյան, Լևոն Խուրշուդյան, Բենիամին Նալբանդյան, Գրիգոր Լեմեշկո, Վահե Եղիկյան, Տիգրան Պողոսյան, Սուրեն Գաբրիելյան, Կարապետ Բուռնազյան, Հակոբ Եղիազարյան, Նորիկ Վարդանյան, Էրիկ Գեղամյան և Արգիշտի Առաքելյան։

 

 

 

Թարգմանեց՝ Արուս Մելիքյանը
("Լրագրություն", 3 կուրս)