РОССИЙСКО-АРМЯНСКИЙ УНИВЕРСИТЕТ

27 Ապր
2026

ՌՀՀ-ում քննարկեցին գեոպոլիտիկական շոկերը և տնտեսական աճի կայունությունը տարածաշրջանային անկայունության պայմաններում

Միջոցառումը համախմբել է ակադեմիական համայնքի ներկայացուցիչների և փորձագետների՝ քննարկելու ժամանակակից տնտեսության հիմնական մարտահրավերները գլոբալ անկայունության խորացման պայմաններում։

«Աշխարհաքաղաքական ցնցումները և տնտեսական աճի կայունությունը տարածաշրջանային անկայունության պայմաններում» թեմայով գիտական քննարկումը տեղի ունեցավ Ռուս-Հայկական համալսարանում ապրիլի 27-ին։

Միջոցառումը համախմբել էր ակադեմիական համայնքի ներկայացուցիչների և փորձագետների՝ գլոբալ անկայունության խորացման պայմաններում ժամանակակից տնտեսության առջև ծառացած հիմնական մարտահրավերները քննարկելու նպատակով։

Մասնակիցներին ողջույնել է համալսարանի ռեկտոր Էդվարդ Սանդոյանը՝ ընդգծելով քննարկվող թեմայի արդիականությունը ժամանակակից աշխարհաքաղաքական փոփոխությունների պայմաններում։

Ռուս-հայկական համալսարանի Տնտեսագիտության տեսության և անցումային շրջանի տնտեսության հիմնախնդիրների ամբիոնի վարիչ Իրինա Պետրոսյանն իր հերթին նշել է, որ միջոցառումն անցկացվում է «Հայաստանի Հանրապետության տնտեսության ներուժի մակրոտնտեսական գնահատումը 2020–2023 թթ․. հնարավորություններ և սպառնալիքներ» գիտական ծրագրի շրջանակում, որն իրականացվում է ՀՀ Բարձրագույն կրթության և գիտության կոմիտեի ֆինանսական աջակցությամբ, ինչպես նաև Ռուս-հայկական համալսարանի աջակցությամբ։

«2023 թվականից հետո արդեն ունենք մի շարք շատ հետաքրքիր արդյունքներ։ Այսօրվա քննարկումը որոշել ենք նվիրել տնտեսական ներուժի փոփոխության և ընթացիկ աշխարհաքաղաքական իրադարձությունների փոխկապակցվածությանը, այդ թվում՝ Իրանի շուրջ լարված իրավիճակին և դրան առնչվող ռիսկերին ու հնարավորություններին։ Մենք դիտարկում ենք, թե ինչպես կարող են այդ գործընթացները ազդել Հայաստանի տնտեսության վրա ոչ միայն կարճաժամկետ հեռանկարում, այլև երկարաժամկետ կայուն աճի և հավասարակշռության տեսանկյունից։ Ակնհայտ է, որ իրական ժամանակում տեղի ունեցող փոփոխությունները ընդլայնում են մեր հետազոտության շրջանակները և չեն կարող չազդել երկրի տնտեսական ներուժի վրա»,- ընդգծել է նա։

Քննարկման հիմնական բանախոսներն էին Ռուս-հայկական համալսարանի ռեկտոր, պրոֆեսոր Էդվարդ Սանդոյանը, ՌԴ ԳԱ Տնտեսագիտության ինստիտուտի տնօրեն, ՌԴ ԳԱ թղթակից անդամ Միխայիլ Գոլովնինը, ինչպես նաև Ռուս-հայկական համալսարանի Տնտեսագիտության և բիզնեսի ինստիտուտի գիտաշխատողները։

Քննարկման մասնակիցները անդրադարձել են արտաքին ցնցումների ժամանակ ազգային տնտեսությունների հարմարվողականության մեխանիզմներին, միջազգային տնտեսական կապերի վերափոխման խնդիրներին, ինչպես նաև կայուն զարգացման մոդելների որոնման հարցերին։ Միջոցառման ընթացքում ներկայացվել են զեկույցներ՝ աշխարհաքաղաքական գործոնների ազդեցության, շուկաների դինամիկայի, ներդրումային հոսքերի և տնտեսության կառուցվածքային փոփոխությունների վերաբերյալ։

Միջոցառումը կազմակերպվել էր Ռուս-հայկական համալսարանի Տնտեսագիտության և բիզնեսի ինստիտուտի Տնտեսագիտության տեսության և անցումային շրջանի տնտեսության հիմնախնդիրների ամբիոնի կողմից։