РОССИЙСКО-АРМЯНСКИЙ УНИВЕРСИТЕТ

21 Դեկ
2022

ՀՌՀ-ն և TUMO LABS-ը ստորագրել են համագործակցության հուշագիր

Արմեն Դարբինյան. «Մենք շատ կարևորում ենք ԹՈՒՄՈ-ն՝ հայկական կրթական բրենդն աշխարհում առաջ տանելու համար»

Հայ-Ռուսական համալսարանի ռեկտոր, պրոֆեսոր Արմեն Դարբինյանը և Թումո ստեղծարար տեխնոլոգիաների կենտրոնի զարգացման գծով տնօրեն Բեկոր Փափազյանը ստորագրել են համագործակցության հուշագիր, որի համաձայն կողմերը համատեղ ջանքերով ուսանողներին ներգրավելու են Թումո լաբերի ինքնուսուցման անվճար ծրագրում:

«Մենք շատ կարևորում ենք ԹՈՒՄՈ-ն՝ հայկական կրթական բրենդն աշխարհում առաջ տանելու համար, նաև շատ բարձր ենք գնահատում մեր համագործակցությունը, ոգեշնչված ենք նոր հեռանկարներով և ջանքեր չենք խնայելու մեր համագործակցությունը էլ ավելի զարգացնելու և ընդլայնելու համար»,- նշել է Արմեն Դարբինյանը։

Ըստ հուշագրի՝ կողմերը փոխադարձ ճանաչելու են կրեդիտները և մասնագիտական, և ոչ մասնագիտական առարկաների համար։

Թումո լաբերի կրթական ծրագիրը կազմված է ուղղորդված ինքնուսուցման և գործնական նախագծերի բաղադրիչներից` հնարավորություն տալով ուսանողներին ձեռք բերել գիտելիքներ տեխնոլոգիաների, կիրառական գիտության և ինժեներության ոլորտներում, այնուհետև ամբողջացնել դրանք գործնական հմտություններով։ Վարժանքների ամեն մի մակարդակի վերջում ինքնուսուցման մասնակիցներն իրականացնելու են մինի-նախագծեր, որոնք օգնելու են իրենց հասկանալ, թե որքանով են յուրացրել այդ մակարդակի թեմաները։

Իր հերթին՝ Թումո ստեղծարար տեխնոլոգիաների կենտրոնի զարգացման գծով տնօրեն Բեկոր Փափազյանն ասել է հետևյալը․ «ԹՈՒՄՈ-ն սկսել են կարևորել ակադեմիական միջավայրում, այն կարևոր է դառնում բուհերի համար, և սա կարևոր ու առանցքային հանգամանք է մեզ համար»։

Նշենք, որ վերոնշյալ ծրագրի վարժանքները և մինի-նախագծերը հաջողությամբ կատարելուց հետո ուսանողներն արդեն հնարավորություն են ստանալու մասնակցել ՏՏ ընկերությունների հետ Թումո լաբերի գործնական նախագծերին: