Ռուս-Հայկական համալսարանի քաղաքագիտության ամբիոնի վարիչ, փիլ.գ.թ. Հովհաննես Սարգսյանը և ՌՀՀ քաղաքագիտության ամբիոնի դոցենտ, քաղ.գ.թ. Նորայր Դունամալյանը մասնակցեցին Ռուսաստանի գիտությունների ակադեմիայի Միջազգային տնտեսության և միջազգային հարաբերությունների համաշխարհային ինստիտուտի (ՄՏՄՀԻ) Համեմատական սոցիալ-տնտեսական և քաղաքական հետազոտությունների կենտրոնի գիտատեսական սեմինարի նիստին, որը անցկացվեց հունիսի 29-ին Մոսկվայում:

 

Հովհաննես Սարգսյանը և Նորայր Դունամալյանը հանդես եկան «Ուժի կենտրոնները որպես Հարավային Կովկասում ազգային ինքնության տրանսֆորմացիայի գործընթացի վրա ազդեցության գործոն» թեմայով զեկույցով: Զեկույցը պատրաստվել էր 24SSAH-5F032 «Ձևափոխվող ինքնությունները որպես քաղաքագիտական հետազոտության խնդիր (Հարավային Կովկասի պետությունների օրինակով)» նախագծի շրջանակներում, որը ֆինանսավորվում է ՀՀ ԿԳՄՍՆ Բարձրագույն կրթության և գիտության կոմիտեի կողմից:  

 

Հեղինակները մանրամասն դիտարկել են, թե ինչպես են արտաքին աշխարհաքաղաքական ճնշումները և խոշոր խաղացողների արժեքային նախագծերը վերաձևում հասարակական գիտակցությունը Հայաստանում, Վրաստանում և Ադրբեջանում: Դասախոսության առանցքային մեթոդաբանական տարրը հենց տարածաշրջանի ներսում այս փոփոխությունները հարուցող հիմնական գործոնների վերլուծությունն էր:  

 

Սեմինարին մասնակցելուց բացի, անցկացվել են նաև գիտական խորհրդատվություններ նախագծի օտարերկրյա գործընկեր, ՄՏՄՀԻ գիտական գծով փոխտնօրեն Իրինա Սեմենենկոյի հետ, որոնց ընթացքում քննարկվել են հետազոտությունների ընթացիկ արդյունքներն ու հետագա հեռանկարները։