ՀՌՀ Հումանիտար գիտությունների ինստիտուտի ռուսաց լեզվի և մասնագիտական հաղորդակցության ամբիոնի վարիչ, ռուսագիտության Կենտրոնի ղեկավար Կարեն Հակոբյանը սեպտեմբերի 14-ին հանդիպեց Նոթինգհեմի համալսարանի արվեստի ֆակուլտետի ռուսագիտության և սլավոնագիտության ամբիոնի դոցենտ Մոնիկա Ուայթի հետ: Կողմերը քննարկեցին ռուսերենի՝ որպես օտար լեզվի դասավանդման հարցերը և Նոթինգհեմի համալսարանի ուսանողների ՀՌՀ գալու հնարավորությունները՝ ռուսաց լեզվի իմացության խորացման և բարելավման նպատակով:

Մոնիկա Ուայթը ընդգծեց ՀՌՀ և Նոթինգհեմի համալսարանի միջև համագործակցության համաձայնագրի կնքման կարևորությունը բրիտանացի ուսանողներին ռուսաց լեզու ուսուցանելու հարցում:

 

«Սեպտեմբերի 15-ին Մոնիկա Ուայթը մեծ ոգևորությամբ մասնակցեց ՀՌՀ օրվան նվիրված սպորտային և ժամանցային միջոցառումներին, ինչպես նաև պարգևատրման հանդիսավոր արարողությանը: Ավելին, նա նույնիսկ հասցրեց հարցազրույց տալ առաջին կուրսի ուսանողներին, որում ընդգծեց նոր մասնաշենքի տեխնիկական հագեցվածության բարձր մակարդակը և համալսարանի  կոմպակտ լինելու առավելությունը, քանի որ այս կերպ բոլոր դասերը անցկացվում են մի վայրում, ինչը, իհարկե, նպաստում է առավել արդյունավետ ուսումնական գործընթացին: Պարզապես համեմատեք. Նոթինգհեմի համալսարանն ունի մոտ 40,000 ուսանող, և համալսարանի մի ծայրից մյուսը հասնելու համար պահանջվում է 30 րոպե», – նշեց Կարեն Հակոբյանը:

Քանի որ սա Մոնիկա Ուայթի առաջին այցն էր Հայաստան, ռուսաց լեզվի և մասնագիտական հաղորդակցության ամբիոնի աշխատակիցները կազմակերպեցին էքսկուրսիա դեպի հին ձեռագրերի ինստիտուտ՝ Մեսրոպ Մաշտոցի անվան Մատենադարան։

 

 

Թարգմանեց՝ Թամարա Նազարյանը
(՞Լրագրություն", 3 կուրս)